"Қайрат" футбол клубы Алматыдағы Орталық стадионды жалға алу үшін қосымша 131 млн теңге төлеуге міндетті
Алматыда сот “Қайрат” футбол клубынан Орталық стадионды жалға алу үшін Спорттық нысандар дирекциясының талап-арызы бойынша 131 миллион теңге өндіріп алды.
Сотта Алматы қаласының Спорттық нысандар дирекциясы “Қайрат” футбол клубынан 131 миллион теңге көлемінде алынбай қалған кірісті өндіріп беруді талап етті. Дирекция мұны аудит қорытындысы мен тексеру комиссиясының нұсқамасына сүйене отырып түсіндірді. Онда 2021–2023 жылдар аралығында Орталық стадионның жалдау ақысы төмендетілген мөлшерлеме бойынша қолданылғаны, соның салдарынан кіріс алынбай қалғаны анықталған.
“Қайрат” өкілдері бұл талаппен келіспеді. Олардың айтуынша, келісімшартта жалға алу ақысы жылына 30 миллион теңге көлемінде бекітілген, 2021 жылғы шарт бойынша талап қою мерзімі өтіп кеткен, ал мемлекеттік аудит қорытындылары клуб үшін міндетті емес.
Қалалық тексеру комиссиясы дирекцияның уәжін қолдап, нақты төленген жалдау ақысы белгіленген нормаларға сәйкес келмегенін растады.
Сот 2021 жылғы келісімшарт бойынша жауапкердің талап қою мерзімін қолдану туралы уәжін негізсіз деп тапты.
“Бекітілген жалдау мөлшерлемелерін қолданған жағдайда, 2021 жылы (25 матч және 31 жаттығу), 2022 жылы (18 матч және 17 жаттығу) және 2023 жылы (18 матч және 29 жаттығу) Алматыдағы Орталық стадионды жалға алу құны жалпы 322,5 миллион теңге болуға тиіс еді. Ал іс жүзінде клуб осы кезең үшін 125,1 миллион теңге ғана төлеген, ал 2024 жылдың тоғыз айында – тағы 66,35 миллион теңге төледі. Нәтижесінде мемлекетке келтірілген залал 131 миллион теңгеге бағаланды”, – деп көрсетілген іс материалында.
Сот талап арызды қанағаттандырды.
“Қайрат” футбол клубы” ЖШС-нен “Алматы қаласының спорттық нысандар дирекциясы” ЖШС-нің пайдасына 131 008 000 теңге, сондай-ақ мемлекеттік баж салығын төлеуге кеткен сот шығындары ретінде 3 930 240 теңге өндіріп алу”, – делінген сот шешімінде.
Дирекция Алматыдағы ең ірі спорттық нысандарды, атап айтқанда “Медеу” мұз айдыны, Орталық стадион, Балуан Шолақ атындағы спорт сарайы, “Алматы Арена” мен “Халық Арена” мұз кешендері, “Сұңқар” шаңғы трамплиндері кешені және Атлетикалық ауылды басқарады.
