Алматы әкімдігі Назарбаевтың қызына қатысы бар фирмамен келісімшарт сомасын 4 есеге ұлғайтқан
Алматы облысының әкімдігі марқұм Болат Назарбаевтың қызы Ақботаға қатысы бар “Tolagai-2050” жеке компаниясымен келісімшарт құнын төрт есеге ұлғайтты. Бұл туралы “Курсив” порталы хабарлады.
Заңгер әрі азаматтық белсенді Бибек Жүнісов әлеуметтік желіде қосымша келісім құжатының суретін жариялады. Онда Алматы облысының құрылыс басқармасының “Tolagai-2050” ЖШС-мен келісімшарт сомасын қосышмша құн салығын қоса есептегенде 7,6 миллиард теңгеден 28,1 миллиард теңгеге дейін ұлғайтқанын көруге болады. Заңгер екі жыл ішінде мердігердің жұмыс құнының еселеп өскенін түсінбей дал.
Ашық деректерге сенсек, “Tolagai Global” және “Tolagai-2050” компанияларының құрылтайшысы да, басшысы да бір адам. Яғни, құрылтайшысы – Оразхан Жанысбеков, басшысы – Қанат Нышанов. Бұл компаниялар құрылыс саласында, атап айтқанда инженерлік нысандар тұрғызу бойынша қызмет көрсетеді.
2022 жылдың қыркүйегінде “Tolagai Global” Алматы облысы Райымбек ауданындағы суару жүйелерін реконструкциялау бойынша мемлекеттік сатып алу байқауында жеңіп алды. Байқау қортындысы бойынша келісімшарттың жалпы сомасы қосымша құн салығынсыз – 6,8 миллиард теңге. Бірақ екі жылдан кейін, 2024 жылдың тамызында, “Tolagai Global” орындайтын жұмыстардың құны төрт есеге өскен.
Алматы облысының Су ресурстары басқармасының мәліметінше, Райымбек ауданындағы бұл жоба 20 суару арнасын және екі гидротехникалық нысанды типтік темірбетоннан жасалған ЛРГ науаларымен қайта құру үшін қарастырылған.
“Жобаны іске асыру барысында таулы жер бедерінің ерекшеліктеріне, темірбетон науаларын жеткізудегі логистикалық қиындықтарға, сондай-ақ зауыттардың жабылуына байланысты монолитті темірбетон конструкцияларына көшу туралы шешім қабылданды. Бұдан бөлек, 2021 жылы құрылыс материалдары мен қызметтері бағасының күрт өсуіне байланысты республикалық жобалар бойынша жобалық-сметалық құжаттаманы түзету қажеттігі туындады”, – деп түсіндірді басқарма.
2023 жылдың маусымында жобалауға жаңа тапсырма беріліп, жаңартылған техникалық тапсырма аясында арналардың өткізу қабілеті екі есеге жуық ұлғайтылды, суару жүйелерінің конфигурациясы мен ұзындығы өзгертілген.
Еске салайық, 2023 жылдың соңында Парламентте “Tolagai-2050” компаниясының өрескел заңбұзушылықтарға жол бергені айтылды. Мәжіліс депутаты Айдос Сарым аталған ЖШС 31 желтоқсан 2023 жылға дейін жалпы сомасы 40,3 миллиард теңгеге 15 шекара заставасын салып бітіруге міндеттенген. Алайда келісімшарт мерзімі аяқталуға жақындаған кезде компания қаражаттың тек үштен бірін ғана игеріп, мерзімді тоғыз айға ұзартуды сұраған. Бұл жобаның айтарлықтай қымбаттау қаупін туғызған. Сондай-ақ ол 2022 жылдың 3 ақпанына дейін “Tolagai-2050” ЖШС-нің құрылтайшылары қатарында марқұм Болат Назарбаевтың қызы болғанын атап өтті.
