Лондонда АҚШ пен Қытай арасындағы сауда шиеленісін реттеуге бағытталған келіссөздердің жаңа кезеңі басталады, деп хабарлайды aristocrat.biz.
Кездесу екі ел арасындағы сауда соғысының салдарын азайтып, жаһандық экономикалық өсімді қорғауға бағытталған.
АҚШ делегациясын Сауда министрі Говард Лютник бастап барса, Қытай тарапынан вице-премьер Хэ Лифэн қатысады. Келіссөздерде сирек жер металдарының экспорты мен Қытайдың америкалық технологияларға, әсіресе компьютерлік чиптерге қол жеткізуі басты тақырып болмақ.
Мамыр айында Швейцарияда өткен келіссөздер нәтижесінде екі ел тарифтер бойынша уақытша бітімге келген еді. АҚШ президенті Дональд Трамп пен Қытай басшысы Си Цзиньпин арасындағы телефон арқылы болған соңғы әңгіме де келіссөздерге жол ашты.
Алайда соңғы аптада екі тарап бір-бірін жасалған уағдаластықтарды бұзды деп айыптады. АҚШ Қытайға бағдарламалық жасақтаманы сатуды тоқтатып, Huawei компаниясының чиптеріне қатысты ескерту жасаған. Ал Қытай АҚШ-тың талап еткен сирек жер магниттерінің экспорттық шектеулерін толық алып тастамады.
АҚШ Ұлттық экономикалық кеңесінің басшысы Кевин Хассеттің мәлімдеуінше, сирек металдардың экспорты бұрынғыдан жоғары болса да, Женевада келісілген көлемге жетпей отыр.
Экономистер бұл сауда дауының жаһандық экономикаға теріс әсерін ескертіп отыр. Экономикалық ынтымақтастық және даму ұйымы (ЭЫДҰ) 2025 жылға арналған жаһандық өсім болжамын 3,1%-дан 2,9%-ға дейін төмендетті.
Қытай жариялаған соңғы деректерге сәйкес, мамыр айында экспорт 4,8%-ға өссе, импорт 3,4%-ға төмендеген. Бұл сарапшылар күткен нәтижеден әлдеқайда төмен көрсеткіш.